Qilaafkani oo ahaa mid dhawaanahanba soo jiitamayay una dhexeeyay Gudoomiyaha Gobolka Banaadir iyo ku xigeenadiisa iyo Masuuliyiin ka tirsan Degmooyinka Gobolka Banaadir ayaa waxaa uu soo shaac baxay, kadib markii xalay ay kulan la qaateen qaar ka mid ah Masuuliyiintaasi Madaxweeynaha Soomaaliya Cabdullaahi Yuusuf Axmed, kaasi oo ay kala hadleen arimaha Gobolka Banaadir iyo sidii wax looga qaban lahaa xaalada amaanka Gobolka.

Mid ka mid ah Masuuliyiinta ugu sareeysa Maamulka Gobolka Banadir oo xalay ka qeeyb galay kulankasi oo ka gaabsaday magaciisa in uu sheego xaalad laxariirta amnigiisa ayaa waxaa uu sheegay in kulanaasi uu ku saleeysnaa sidii wax looga qaban lahaa xaalada amaan ee Gobolka Banaadir oo ay sheegeen in uu dhabar jabin ku wado duqa Magaalada Muqdisho Max’ed Dheere.

Sidoo kale waxaa uu Masuulkasi sheegay in Madaxweeynaha uu u balan qaaday in wax laga qaban doono cabashooyinkasi ay usoo gubiyeen, isla markaana nidaam cusub loo sameyn doono Gobolka Banaadir.

Masuuliyiintii xalay kulankii ka dhacay Madaxatooyada la qaatay Madaxweeyne cabdilaahi Yuusuf ayaa waxaa ka mid ahaa 5 Xubnood oo ka mid ah kuxigeenada Maamulka Gudoomiyaha Gobolka Banaadir,kuwaasoo kalahaa godoomiye kuxigeenka Gobolka dhinaca arimaha Bulshada.Nabadgalyada,Maaliyada,Howlaha Guud,dib u dhiska iyo dib u heshiisinta.

Waxaana kamid ahaa xubnaha Madaxweynaha lakumey ee katirsan kuxigeenada Gobolka banaadir Max’ed Cismaan Cali Dhagax Tuur, Cabdi Fitaax Ibraahin Cumar Sabriye Shaaweeye,Max’ed Yarow,Cumar Aweeys Nuur Cumar Dacas iyo Cabdi Xaashi Liibaan iyo Gudoomiyayaasha 13 Degmo oo ka mid ah Gobolka Banaadir.

Gudoomiyayaasha Degmooyinka kulankasi ka qeeyb galay sida uu shegay Masuulkasi u waramayay saxaafada ayaa kala ah Waaberi,Xamar Jab Jab,Xamar Weeyne,Hawlwadaag,Boondheere,Hodan,Wadajir,Dharkeenley,Yaaqshiid,Shibis,Cabdi Casiis,Huriwaa iyo Daayniile, iyo labo Agaasime Guud oo dhanka Maaliyada iyo Nabdgayada ah.

Dhamaan Masuuliyiintaasi ayaa waxaa ay ku eedeeyeen Gudoomiyaha Gobolka Baanadir ahna duqa magaalada Muqdisho Max’ed Cumar Xabeed Maxmed Dheere in uu ka danbeeyo dhibaatada ka taagan Gobolka Banaadir iyo amaan darida ka taagan Magaalada Muqdisho, isla markaan uu wax ka qaban waayay uuna xagal daacinaayo Maamulka Gobolka.

Weli wax war ah kama soo bixin Gudoomiyaha Gobolka Banaadir Max’ed Dheere oo ku aadan eedeyntaasi ka soo yeertay kuxigeenadiisa iyo Masuuliyiinta Degmooyinka Gobolka Banaadir qaarkood, xili Max’ed Dheere uu in badan horay u sheegay in uu wax ka qabtay Maamulkiisa arimaha Amaanka Gobolka Banaadir.

Arimahani ayaa waxaa ay ku soo beegmayaa xili qaar badan oo ka mid ahaa Gudoomiyayaasha Degmooyinka Gobolka Banaadir ladiley,halka qaar kale oo Maamulkasi ka tirsanaana ay isaga tageen xilaalkii ay hayeen, kadib markii ay cabsi la soo deristay.